À Petru Casanova

Ch’ellu sia ringraziatu quindi, Petru Casanova andatusine da pocu. Tante grazie per l’attichju soiu, à prò di i soi, di quella Mimoria secularia, fatta di puesia viva. Serà listessa puesia chì face chì a so opara (Motti, Appellamanu, a so participazione à l’ADECEC) ci fermi oghje vicinu sempre. Robba li avia digià cunsacratu un articulu ùn hè tantu : https://www.rivistarobba.com/Petru-Casanova-maestru-di-u-vivu_a120.html

Ùn vulteremu micca à nantu à u so parcorsu propiu particulare, puntillatu di viaghji, scontri, racolte, po da l’ arte di trasmette.
Puru affugati da i valori novi di a « riescita … », à chì i vole stà à sente, ci sò vicinu, quelli motti pront’à insuchjà un  imaginariu paisanu oghjincu.

Vulteremu quindi à ciò ch’è no ritinimu di a so primura fonda. 
Da supranà a parolla mediatica da Verità unica, chì d’affanni è di scunsummu ci chjama sempre più à u cunsummu in cumpensu ; da supranà la st’ecunumia di u Prisente sulignu, ch’ùn sà più truvà sullevu à mezu à e vie parechje di e mimorie pupulare… Eccu dunque dui, trà tanti altri, Motti di Petru Casanova, di quelli chì tornanu robba priziosa da ramintà ci quantu l’arrembu d’una Terra ci face è ci cunface.

Dicenu ch’ellu si ne hè andatu Petru Casanova, ellu chì pascia à nantu à i so 105 anni. Petru hè statu chjamatu à turnà cum’è l’acqua, à i so paesi.
Ma chì seranu i numari, s’elli sanu cuntà solu a robba andata, senza misurà quella chì ci hè lasciata è ferma oghje torna ?
 
Pudè barattà cù Petru stu poc’è tantu, for’di tempu, vi lascia di chè sente trizinà, à mezu à a pena tamanta nata da sta strappatura chì vi alluntana sempre più di u spiritu paisanu…  Ghjust’à mezu, una sgheza, induv’ellu ci campa torna un mondu d’affettu di quellu chì ci tene strettu strettu. Quellu mondu induve a robba vinuta hè custudita à prò di u vivame quant’è d’una mimoria, ch’ùn hà mai spiccatu i morti da i vivi...
Mi hè parsu di sente à mezu à e parolle di Petru, una chjama à piglià cuscenza di a manera di participà ci, noi astri è tutti quanti, à e regule di stu mondu d’oghje.
 
Postu chì Petru si n’hè turnatu à ritruvà i soi, femu puru dui passi in daretu, da sparte torna duie di e ragiunate soie. Robba chì, sì Dì vole, ci puderà aiutà à fà populu torna, capace à campà quindi è avale, da per noi, à nantu à u nostru, sempre in traccia di fà ci...
 

Ghjacumina Acquaviva-Bosseur
 

A fattura [1] di l’arcanella [2] hè listessa chè quella di l’Ochju, piattatella à a larga [3] di passeghju, sottu à qualch’arbuscéllu d’órtu, d’òréstu di valdu [4], o machjarélla scupina o albitrina.
Ciò chì cambia ? A ricercatezza di a guarditura. U cióttulu ghjè impiumicciatu [5} d’erba bambina [6} è di pilliccia. U dentru spessu zùffulu d’affarucci arripósti à fóra è à misura di e vìsite, micca à infrugna infrugna, ma bell’accunciati nò di fiuricélli, ma di stufichje [7} culurite, di chjàppuli invernicciati [8] di petricelle fuligninose [9], di bòttuli di matreperla [10] ed ancu à casu vigliatélle [11] è dentarelli [12].
Sìmule Paradisu [13], curatu quantu a lùciulula [14], s’asconde sòttu un vetru impulveratu di rena, terra fine ò tràmula [15], fermendune in vita sana u cuntìnuu [16}, l’ìntimu sicretu di a so’ zitéllina in fiùrisi [17].
 

 

Cummentu  (G. Acquaviva-Bosseur)
 

Cù stu ghjocu si tratta d’amparà à misurà u passu trà u nentru è u fora, sta parte d’intimità da intrattene, trà sè è l’altru. U ghjocu di l’Ochju vulia amparà à sceglie u scartu ghjustu trà ciò ch’ellu si mostra è ciò ch’ellu si tene per sè.
L’Arcanélla, hè un ghjocu chì s’addirizzava di più à e giuvanotte, ancu chì u fattu chì Petru Casanova ùn la mintuessi micca quindi, porta à riflette in quantu à a spiccanza oghjinca di i gèneri maschili è feminile. L’arcanèlla s’addirizza dunque à un’interiurità capace à curà e minuzie priziose da risirvà le à mezu un arcanu ciòttulu.
Quellu ciòttulu di Terra, à u pede d’un sèpalu o d’un àrburu custodiu, dice dinù u liame sacralizatu cù una Natura per fà si. È nutemu bè chì a parolla Natura, in corsu, traduce l’idea oghje più sparta di sessualità à tempu ch’ella insegna u sessu feminile (strumentu è prucessu di ciò chì hè Natu è naturale).
Eccu un ghjocu chì si face rituale è aiuta à francà u passu di u zitellame pront’à fà si u o a giuvanotta in fiòrisi, accumpagnati per l’occasione da una tradizione induve a Magia di u ritu permette d’incantà un Mondu novu, fattu Soiu [18].
In tempu di cummunutà virtuale, è di rete suciale in manu à i nostri giuvanotti, senza altra guida cà a sbacca d’un’Individualità sempre più in brama di ricunniscenza, u ghjocu di l’Ochju ci ramenta quant’ell’ accunsente à l’Ànima l’arte di sacralizà un Paradisu propiu soiu, à l’appiattu di tutti.

---

« Si parlava di casa, fucòne, ghjésgia, di tacca (sègnu di mórte), di fiuminali, di partenza…U paciaghju circava à sapè u locu, u tempu, ciò chì stalvava, induv’ellu s’andava, ciò chì si timìa per ghjente, bestie è robba.

A scélta di a spalla dinò cambiava : a spalla rita di muntunèttu o purcastru, a spalla manca capruna.
Da nutà chì e donne, elle, eranu più avvezze à inciartà i tempi à veni per via di u sprònu di i ghjalli (l’ergot du coq), o di e cènnere di u focu natalèscu.
 
U paciaghju, zittu è bassu [1], stà assentitu [2]. Di l'altru, ne cóglie e parólle è ne léghje in faccia, in l’óchji è e membre, u patimentu [3], l'affanni [4], l'angoscia, e peure, i timori [5]. Mai, ellu averte [6], ne menu ghjudica [7] ò assòlve [8]. Eppuru, ellu cunfórta [9] è pórta pace [10].

---

Certi ghjóchi, làscita d’un fòndu cummunu arcaicu è mediterraneu, ci venenu direttamente da i più vechji tempi andati; d’altri cunservanu sempre u so’ tigliu [1] - a so’ incambratoghja [2], diceremu - di u Mediu Evu.
Ste giuvanile emuzioni chì esaltanu; ste fughjasche creazioni di u spiritu, chì sfidanu u pussibule; sti sogni vani di a nóstra zitéllina; soga ùn ci stupimu un bel ghjòrnu di vedeli risórge indè l’attuale realtà?
 
Cusì, u ghjóculu cù u so’ curullariu u ghjócu - passatempi diceranu - ma però sumiglia di a vita, pruseguerà tòrna per lòngu tempu à fermà un putente levitu di « creatività » è un trafrancu di l’istintu.
 
U zitéllu truverà d’istintu indè a lingua materna, a puesia è a magia di e paróle, chì armeranu, in vita, u so’ sfórzu naturale, efficiente è lucidu.
Rispettemu a Natura, attempu unica è multiplice, duvè u chjucu scuprerà prufònde mutivazioni.
 
Cundannemu u fattu è lestu, u modulatu, u « robot » di frònte à u zitéllu chì ci si mira.
Fermemu adulti cun attitudine permanente d’aiuta.
Offrimuli u veru, u bellu di ista natura generosa chì si chjamanu Terra, Acqua, Petra, Legnu, Elettricità, Metallu...
 
Ritruvemu puru i nóstri sensi ed e nóstre mani di zitélli ; frà elli, u bè è u male, è u bonu è u bellu, apparisceranu à e nóstre menti addistrate - quand’elle ùn sò spaperse! - sott’à un’alba nuvélla.
 

---