Contrafocu

Cum'ellu a scrivia Nanni Moretti à u so "Caro Diario", Fanfan Griffi hà sceltu di scrive à Robba da sprime a so visione di li tempi, cum'elli vanu, cum'elli ùn vanu... Cum'elli puderianu andà megliu dinù. Eccu quì una prima cronaca da savurisce !



Habit d'un médecin du Lazaret de Marseille, 1720. Guide sanitaire des gouvernemens européens by Louis-Joseph-Marie Robert.
Habit d'un médecin du Lazaret de Marseille, 1720. Guide sanitaire des gouvernemens européens by Louis-Joseph-Marie Robert.
Cara Robba,

Ma sai chì sti pochi ghjorni m'hè chjappu u tichju d'andà à leghje ti…di sicuru scalambroni, per casu di tanta materia scritta è di poca pratica persunale annantu à parechji sugetti ammintati, ma quantunque abbastanza incrichjatu per pruvà à capisce u to parè malgradu, à dì la franca, qualchì difficultà.

Eppuru, Cara Robba, a sai, campemu tempi mischini, manghjati da l’interessi di i giganti chì volenu à tuttu contu tene u putere, ch’ellu fussi puliticu, finanziariu o puru - murtale per ogni civilisazione - culturale.

Ma dì mi à pena cume per tè, isulana di prima trinca, si pò cuncipisce,  annantu à un ghjuvellu tale a nostr’isula, alluminata di tante grazie, d' essene ghjunti à campà à rombu di fà a scimmia per avè qualchì brisgiulu à l’usciu d’isse tichjine… È forze quì, a vera ingannata, quella di pensà chi a salvezza è u benistà  anu cume genitori l’infinitu maiò è l’infinitu soldu (d’altronde à spessu scherzu ind’è e mo stacche) à prò di una manghjatoghja chi ci avvelena… Vale à dì per noi altri, ghjente di st’isula, vulè campà cun l’illusione di a tratichjina di u famitu… Riccu incù i povari, miseriosu cù i ricchi.

Vuleria dì ti quantu a lettura di i to parè mi pare esse un contrafocu di pettu à ste strane situazione … Ma ancu quant'ellu mi pare di primu penseru a cundizione fatta à i populi detti minuritarii annantu à a so terra … U gigantisimu è à praputenza di a mundialisazione hà taluzzatu u « Small is beautiful  » caru à Schumpeter … Di sicuru u mondu si perde d’avè persu u geniu di u chjucu à nome di un’ universalità senza cunfine capiscitoghje… Hè 'ssu disprezzu chì u manda à caternu.

Miguel Torga, magnificu pueta purtughese, hà scrittu in l’anni 1950 « L’Universale ghjè u Lucale menu i muri »… Per avè troppu scioltu, u mondu mudernu hà creatu tanti lochi induve una riflessione simule ùn hè più pussibile … Per furtuna a mo realità ùn hè quessa… Aghju sempre memoria di i mei chì m'impedisce di lascià a rimigna ricopre a so tomba, chì sustene u ricordu di i mo lochi, di a filetta, di e rustaghje… Ùn ci hè avvene senza memoria, ùn ci hè spartera senza ricunniscenza per tutti di 'ssa realità …

Eccu u scopu di a Corsica oghjinca : ritruvà l’orma di i passi mille volte francati… Hè tandu ch’ellu rinascerà u desideriu di cambià un’ universalità chì balla oghje sopra à l’abbissu.

Cara Robba, più chè di mutazione o di transizione u mo scopu oghje hà per mottu di superà l’interdettu chì m’hè impostu da un mondu abbriacatu…Trasgredisce !
Jeudi 29 Avril 2021
Fanfan Griffi