In memoriam Guidu



S’hè spentu l’amicu Guidu Benigni, u 21 di farraghju, in la so casa di Campu Vallinu in Pigna. Fù gran' cavallieru, pueta, scrittore, traduttore di Dante e di García Lorca, e ancu presidente di l’Accademia di i Vagabondi. Pè salutà a so mimoria, eccu una di e so tredici “Favule zitelline” sempre inedite, pè ramentà si chi, cum'ellu dicia Aragon, u pueta ùn more mai.



Orfeu, Tonì Casalonga, per Mitulugia, scrittu da Guidu Benigni
Orfeu, Tonì Casalonga, per Mitulugia, scrittu da Guidu Benigni
U Musicante è i Ladri.
 
Ci era tandu un Musicante in Folelli
chì sapia fà ballà vechji è zitelli.
Rientrendu di nuttata per i strada,
dui ladri, o la sorte disgraziata !
l'anu mezu chè occisu è arrubatu
a so cetera, u sumere è u stantatu.
 
L'indumane fù succorsu da la ghjente
chì l'avianu truvatu feritu è languente.
"Puvarellu ! Cum'è ferà per campà ?
dissenu elli. Cum'è vi sentite, o cumpà ?
È senza più nunda, cum'è averete da fà ?"
 
"Camperaghju listessu, o cari,
senza fera, nè strumentu, nè danari.
Una cosa chì mi resta è chì ladracci
ùn anu pussutu piglià cù li mio stracci
ciò chì fù sempre a mio richezza :
a Musica, o chì bellezza !"
 
Muralità :          
Quelle chì mai si ponu impriggiunà
è nè menu arrubà
in qualchì voglia sia
sò Musica è Puesia.
 
 
Samedi 25 Février 2023
A squadra