U Palazzu Naziunale, un associu dinù

Nimu s’hè scurdatu chì per (ri)apre l’Università di Corsica, ci hè vulsuta una mossa populare assai putente, è chì per anni è anni, parechje strutture, omi è donne si sò impegnati cù stintu. L’Università d’estate (è nanzi e Ghjurnate Corse di Corti) anu avutu un rollu impurtantissimu indè st’andatura. E hè ciò chè no vulemu rammintà oghje. Daretu à st’evenimenti maiò, qual’hè chì s’arricurderà chì c’era un associu chjamatu U Palazzu Naziunale ? Qual’hè chì a saperà chì st’associu hjè statu un veru laburatoriu di cummunicazione pulitica è di sparghjera di l’idee ? Stemu à sente à GhjuvanGhjacumu Albertini, attore è artigianu maiò di u Riacquistu è creatore di st’associu.



U Palazzu Naziunale, un associu dinù
S’elle sò messe da cantu certe attività culturale isulate mentre e statine di l’anni 1960, si pò dì chì e prime Ghjurnate Corse di Corti principianu d’aostu 1970, cù a participazione di l’associu « Lingua corsa – U Muntese » è dui di i so attori principali, Petru Ciavatti è Ignaziu Colombani. A Lingua corsa, appuntu, era u tema di fondu d’issa Ghjurnata, ritruvatu in u 1971, attempu à un penseru di ripresa di riapertura di l’Università di Corti. U mondu venia, i scontri eranu attivi, ma si staccava omu senza punti precisi per i lindumani. Una struttura nova abbisugnava, aggruppendu ghjente è criendu mezi privati, per intraprende e assicurà, indu l’indipendenza, una lotta di durata. Nacque cusì, in u 1972, a voluntà di creà un associu, dopu una cuncolta in Corti cù u prufessore Farrandu Ettori, direttore tandu di u Centru Culturale Corsu à l’Università d’Ecchisi. Sarà U Palazzu Naziunale : nome sceltu, simbolicu, per via di u casamentu storicu chjamatu cusì ma sempre in francese à l’epica di u 1970 : Le Palais National.
A spalluzzera di i participanti impunia ch’issi scontri principali si tensenu in periode di vacanze universitarie è sculare. Fù cusì ch’indu l’istatina 1972 sò state avanzate e prime idee precise per organizà in u 1973 e Ghjurnate Corse di Corti, attempu à l’Università d’estate.
 

Cumposizione di l'associu

U Palazzu Naziunale, un associu dinù

Da u 1972 à u 1977, sbordanu l’attività propie à l’organisazione in raportu cu i prugrammi di l’Università d’estate è quelli di e Ghjurnate, ancu s’elli ùn sò, elli, annunziati capu nanzu assai. Vale à dì chì al dilà di prevede corsi e cunfarenze, al dilà di tuttu acconciu à caratteru fisicu (assestime tutale di i lochi d’accolta, cu alloghju e nutrimentu), e preparazione battianu, in Corsica è fora di Corsica, per annunzià, anticipendu à repetizione, l’altu mumentu di a statina, di sicuru, ma tant’altri, in alleiu cù muvimenti corsi fora di l’isula.
Pudemu parlà di dibattiti è gruppi di cantu ma dinù di filmi è muntami ch’eranu robba assai più nova. S’agisce di filmi amatori in S/8 e di muntami di tralucente, in lingua corsa, prudutti da l’associu. Utile per animà e serate di e « Ghjurnate », so stati prughjettati assai fora di Corsica. U filmu Da u granu à u pane ha ricevutu u primu premiu di u filmu amatore in Bastia. In più di i filmi, u serviziu « vidiu » assicurava, in lingua corsa, a televisione interna à l’Università d’estate e di e « Ghjurnate ».
 
In Corsica stessu, si battia dinù ! Chinate in lingua corsa, archeulugia di tarrenu ma dinù cuncetti novi cum'è u giru à l’induvinu (« Giru » in autumobile, cù infurmazione rivelate in cor’ di percorsu per pudè lu cuntinuà. Punti è tempu acquistati in funzione di a cunnuscenza di a Corsica, in Lingua corsa) o creazione d’una « furesta » quandu chì 2000 pini sò stati posti di dicembre 1973, cù i cunsiglii di l’ONF, à a Bocca Petrera, sopra à Corti nordu. U ben di Ghjacumu Luciani, ghjurnalista, scrivia « Dumane una furesta »
In issi mumenti di u 1970, chì cunniscianu un soffiu creativu purtatu d’altri associi è muvimenti pulitichi, U Palazzu Naziunale s’hè datu à sustene a cumpunanza culturale di l’Azzione Reghjunalista Corsa, ella stessa avendu sempre, cum’è d’altre organisazione pulitiche, una delegazione attiva à u senu di e Ghjurnate e Università d’estate : lotta per l’Università, a Lingua corsa… E pè sparghje largamente, s’hè adupratu dinù Nascita di a cumunicazione pulitica cù à vendita militente d’articuli creati da U Palazzu Naziunale, in raportu cu i sò scopi.
 

Ochjata

U Palazzu Naziunale, un associu dinù
Fattu à l’accortu, issu percorsu, innù i passi di U Palazzu Naziunale, ci hè necessità di rivelà quantu chì una piccula struttura attiva pò esse creatrice d’un spaziu, praticu è mentale, ghjuvativu à persone o gruppi, per rinfurzà idee è sensibilità vicine. Ci hè, da issu fattu, un accrescimentu in circustanze militante chi pò ancu annegà ciò chi si trova à l’iniziu ?
Ma un soffiu novu esce da u bagnu. Ghjè a petra cumuna messa in postu da e mane di l’inseme, a petra di l’Aiutu, per creà è per custruì.
 

GhjuvanGhjacumu & AnnaMaria Albertini
GhjuvanGhjacumu & AnnaMaria Albertini

U Palazzu Naziunale, un associu dinù


 
Vendredi 29 Octobre 2021
GhjuvanGhjacumu Albertini