Robba
 



Impegnà si in paese


Innò, u paese ùn hè micca solu u locu di e vacanze è di a nustalgia. Pè unipochi hè sempre locu di vita è d’impegnu. Simu andati versu Vicu à scuntrà dui paisani assai arradicati chì scumbattenu pè i so lochi.
Francescu Amatu Arrighi hè propiu Viculese residente in paese. Hè statu prima infirmieru in i paesi di a pieve di Sorru, è dapoi calchi tempu, hè direttore di « L’EHPAD » di Vicu è di u « FAM » in i bagni di Guagnu. U so amicu Petr’Antone Beretti s’occupa di l’associu Sorru in Musica arrughjunatu in Vicu dapoi a so creazione in lu 2004. Insegnante durante quasi 20 anni, ghjè avà in carica di l’audiovisivu à u Canopé di Corsica è campa in Aiacciu.
Tramindui ci contanu a piazza di u paese in a so vita, è ci parlanu ancu di a piazza di sti paesi in a Corsica oghje.



Vico, Edward Lear (1812-1888)
Vico, Edward Lear (1812-1888)
Francescu Amatu Arrighi : Cum’è tant’altri ghjovani Corsi di a me generazione, aghju sempre avutu da chjucu u sonniu, o a sperenza, di stallà mi in paese pà stà ci è travaglià ci. Ùn ci pensava mancu à pena ch’ellu ne fussi statu altrimente. Eccu forse a raghjò chì m’hà fattu sceglie u mistieru d’infirmieru al dilà, bensicuru, di u fattu ch’ellu mi piacia par via di u so aspettu umanu.
Sin’à tandu stavamu in famiglia in Aiacciu pà i studii, ma u core battia in paese, è a brama di vultà ci prestu mi brusgiava l’anima cum’è un focu ardente. 
U paese era più cà un locu di vacanze. Era a fonte di l’identità chì si svegliava. Si po pinsà chì tandu, i liami di a parentia è quelli di l’amicizia, ma dinò a tramandera par l’anziani di a lingua è di e tradizione culturale è religiose, funu i puntelli maiò di a custruzzione d'un ideale di vita è d'una cuscenza pulitica.
Campà in paese cum’è l’impegnu militante di cuntribuì, cù tant’altri, à a custruzzione d'una sucetà corsa nova, arradicata à a so cultura prufonda è aparta à u so ambiente naturale, u Mediterraniu. In Corsica tandu, in l’annate 1980, trà una francisata chì, à u capu di dui seculi, vidia sbuccà a so opara è a una mundialisazione chì si facia di più putente, u paese ci paria firmà l’ultimu locu sacru di l’anima corsa.
Ma ciò chi dava sensu à i figlioli appassiunati, paria una scimità à i genitori benevulenti…
Ùn era tandu pussibule, à quelli chì eranu nati in paese, è chì si n’eranu andati ind’una mossa suciale è ecunomica cuntraria, di cuncipisce lu cum’è un locu di spannamentu parsunale è prufissiunale.
 
Petr’Antone Beretti : Eiu a dicu franca è chjara, in paese ci aghju campatu un annu solu ! Cum'è per te, è cum'è per parechji zitelli di u Riacquistu, l’idea di campà in paese era mitica per mè! Era una manera di ritruvà u ceppu familiale è l’amichi, è d'entre dinò in un schema militante di l’epica !
Sta visione di carta pustale si piantò in lu 1995, dopu avè passatu un annata sana in Vicu. A l’epica, insignavu cum'è prufessore di e scole «titulariu rimpiazzante», faciu u giru di e scole da a Cinarca à i Dui Sevi passendu per u Sia è ben intesu i Dui Sorru.
Mi piacia assai à fà u tragulinu per ste scole paisane : scuntrà zitelli, parenti è ghjente diverse, essendu accoltu più chè bè da i paisani cuntenti di truvà un maestru per sti lochi scantati! A vita in Vicu ùn mi dispiacia micca, ma mi mancava una dimensione : a cultura…
Falavu tandu à piglià i corsi di teatru in Aiacciu, cullava in Bastia à vede spettaculi, è in Corti per e serate studientine ! Di manera più seria, s’ella mi mancava à mè a leia cù l’arte in generale, mancava soprattuttu à i zitelli ch’eiu scuntravu per ste scole luntane da e cità!
 
Francescu Amatu Arrighi :
Un hè mai semplice… Ciò chì ghjè statu duru per mè quandu mi so stallatu, ghjera a putenza di e forze negative. A scelta di campà in paese paria, è pare forse sempre ancu avà à unipochi chì ci stanu, una vera scimità, a prumessa di un fiascu sicuru. Stu sintimu tene d’una raprisentazione suciale ch’ùn pò esse uggettiva è chì tocca à un diterminismu o puru à un fatalisimu incuscente d'una parte di a cumunità chì disprezza u so ambiente paisanu. « Corsica (di l’internu) non avrai mai bene » !
Ma a fede ùn si pò parà !
E u fattu chì Vicu sia quantunque un paisone d’una millaia di paisani, incù una vita ecunomica è amministrativa abbastanza sviluppata, cù una scola è un cullegiu, ne face un locu attrattivu. 
Ma, 30 anni fà, u fattu diterminante di pettu à un sistema puliticu arcaicu hè statu soprattuttu u dinamisimu assuciativu purtatu frà altri da u cunventu San Francescu ind’è a parsona di u padre Bonnafoux. Porte di u cunventu spalancate à tutti, vechji è ghjovani, credenti o micca, paisani è ghjunghjiticci, omi è donne. Locu d’apartura, d’amparera, di scambii, di scontri, di cuntrasti, di speranza, di fede, di carità, di cultura è di riacquistu. U cunventu di Vicu cum’è a stazzona umana d’un « paisanu lìbaru » chì pudia principià à pensà à l’avvene di i so lochi d’una manera nova. Hè stata a dinamica assuciativa chì hà fattu nasce a vulintà di fà inseme, chì ci hà parmessu di custruì in aiutu un locu di scontri in cunventu. Sta sperienza uriginale hè stata a prova ch’ellu si pudia fà prugetti in paese quand’ella c'era una vera vulintà cumuna. 
 
Petr’Antone Beretti :
Iè, à contu meiu, a pratica di l’assuciativu saria cum'è un' università di u « campà inseme ». S’ampara à parlà cù persone diverse, à travaglià cun elle, à mette in ballu un opera cullettiva à prò di u cumunu.
Dopu à st’annata di « Riacquistu paisanu » mi sò avvicinatu d’Aiacciu, ma aghju sempre tinutu a leia stretta cù u paese. Sopratuttu cù l’amichi paisani chì m’anu purtatu in li so prugetti assuciativi : ci hè statu prima « l’Associu di l’amichi di u cunventu » guvernata da u tercanu  Jean-Pierre Bonnafoux : dibattiti, corsi di ballu è di cantu, serate pulenta, poi a cunfraternita di u Padre Albini, ch’ai messu in ballu incù u to fratellu Ghjuvan Larenzu.
Poi à u principiu di l’anni 2000, ci hè stata l’avventura di Sorru in Musica cù u viulunistu Bertrand Cervera, u scopu era simplice : purtà a musica è a cultura à tutti. Un bellu prugettu chì cuntinueghja a so strada quasi 20 anni dopu.
 
Francescu Amatu Arrighi : Par l’avvene, ci tuccarà à fà di e dibbulezze di a sucetà paisana e forze di u nostru campà inseme par via di prugetti uriginali è assistati. Bisognu à anticipà e mutazione di a sucetà par divintà capaci di parà si d'un avvene chi saria quellu d’una morte annunciata.
Hè cusi chì, al dilà di u puliticu o puru certe volte di pettu à ellu, a reta assuciativa ferma oghje una leva putente pà u sviluppu paisanu è pà u liame suciale. 
In a pieve di Vicu a prima realità hè chì a maiò parte di l’impieghi creati dapoi 20 anni sò stati in lu sittore di l’ecunumia suciale è sulidaria. 
A siconda hè chì i spazii i più impurtanti di scontri è di spartera sò nati cù prugetti culturali assuciativi cum’è frà altri : « L’amichi di u cunventu san Francescu », « Sorru in musica », « U ricordu di Circinellu », « A festa di u mele » o « Si pò fà ».
Fermanu di sicuru e custrizzione inerente à u rurale di l’internu è tocca à u pulìticu à dassi di manu pà riduce le cù assestamenti è prugetti strutturanti cum’è stradoni, trasporti in cumunu, accessibilità numerica, servizii suciali è amministrativi di vicinanza. L’urgenza pare forse esse oghje à u livellu suciale. 
 
Petr’Antone Beretti :
Eiu pè l’avvene spergu di cuntinuà à fà l’intermittente di u paese !
« Quessu vole fà, mà …ùn ci stà mancu in paese ! » Sta frasa sò trent’ anni ch'eiu a sentu, ùn aghju mai avutu u me statutu di residente ! Hè vera chì certe volte, ùn hè cusì faciule d’impegnà si, si trova sempre à qualchissia chì e ci face falà : «è perchè faci què, ùn ghjova à nulla… eppò travaglii cù u tale…».
Ci vurria à dumandà à quelli chì ci stanu tuttu l’annu, mà pensu chì ci vole à adimette chì u travagliu fattu ind'è l’associ hè certe volte pocu ricunnisciutu da a ghjente di u paese. Ùn hè micca una critica, hè un fattu, ch’ùn m’impedisce mancu à pena di crede in lu travagliu cullettivu à serviziu di u cumunu è di cuntinuà più chè mai !
Sè in qualchi manera sta « pruposta culturale » di Sorru in Musica pudessi ghjuvà à i paisani è in particulare à i più giovani, saria digià una bona ! Sarià forse à me manera di « campà u paese » eppò forse dinò una manera di ringrazià u paese, stu locu predilettu chi m'hà purtatu tanta felicità.
 
Francescu Amatu Arrighi :
Dapoi u 2010, sò dinù diaconu di a ghjesgia cattòlica latina. Ind'è a tradizione di a Ghjesgia u diaconu hè propiu u ministru di u serviziu. Hè cusì chì u longu caminu di fede, da u cantu ghjesgiale à l’urdinazione diacunale passendu pà a fundazione di a cunfraternità di u padre Albini, hè vinutu propiu à fà esce u sensu prufondu di u me impegnu paisanu. Quellu di u serviziu chì diventa forse, strada facendu, una gioia o puru un spannamentu parsunale. A furtuna di scuntrà à u Signore ind'è l’altru ùn hè solu un’idea o una filusufia. Hè una realità. Stu ministeru in paese hà, di sicuru, una dimensione spirituale, ma dinò una purtata suciale. Si scontra ind’un quadru di più strettu è intimu, famiglie, parsone anziane, ghjovani, prumessi sposi, malati o famiglie in dolu.
 
Circà à umanizà mi sempre di più è à fà cresce u sensu di l’umanu frà l’omi, eccu u scopu di a me strada di sperenza. Pruvendu cù d’altri à prumove a creatività di l’arti è di a cultura, à piglià u risicu di l’innuvazione, à fà cresce a cultura di prugetti spartuti, à tesse e leie di u mischiu suciale, à custruì spazii di scontri, di dibattitu è di spartera. Eccu a me fede ind’è l’Omu pà invintà ind’una mossa cumuna u paese corsu di dumane. In grazia di Diu !
 
Jeudi 30 Décembre 2021
Francescu Amatu Arrighi è Petr'Antone Beretti


Dans la même rubrique :
< >

Jeudi 29 Février 2024 - 22:08 Paesitudine : una risposta da l’altra sponda