Dopu à u focu, a tramula

In quidda nuttata sò più di 40 anni d’investimenti matiriali, ma dinò una certa filusufia di a ruralità nostra chì sò stati spazzati da una manu latra. Parchì ? Chì sarani stati i mutivazioni di quiddu (o quiddi) chì ci ani picciatu u nostru bè cumunu, chì a nostra a Fiera ùn ci apparteni micca, chì hè di tutti ? Ùn si sà, è forsa saria megliu à ùn sapè la micca, chì a dilusioni pudaria essa tamanta. Minacci micca… Ghjelusia ? Ùn semi ch’è una fiera senza risorsi finanziarii spripusitati, chì semi un associu quant ‘è l’altri, cù i so difficultà cuttidiani di gestioni.
Tarreni da spiculà ? Mancu à pena chì u nostru campu di fiera l’appighjunemi. U depòsitu  l’aviami in affittu dinò chì hè robba di i camin’di farru di a Corsica, vali à dì da a Cullettività di Corsica. Sarà edda in mira ? Sarani in camin’ di farru ? U cantieru d’inserimentu chì eddu dinò s’hà persu a tutalità di u so matiriali ? A merria di Bucugnanu ? Una parsona qualunqua di u nostru associu ? U so presidenti ? À dì la franca n’avemi pocu a primura ! Ciò chì ci imprema hè di ricustruì è di ridà vita à u nostru associu è à a nostra Fiera, chì a nostra a missioni hè di più impurtanti ch’è di circà à sapè o à capiscia comu, parchì è contr’à quali…

Oghji in Corsica, stu paesi ch’ è no vulìami benedettu pà i nostri figlioli, è ch’avemi circatu à ricustruì da cinquant’anni è più, ci pari ch’eddu si lampessi à sciappa ciarbeddu in un abissu di malfatti, d’òpari foschi è torti è à li volti di viulenza palisata chì tocca i più bravi è degni di i so figlioli. U focu assassinu, novu mezu di prissioni o di vindicata (ùn chjamu micca què vindetta chì sta parodda faci affaccà à gallu una maghjina di più anticogna è forsa più tradiziunali di a nostra storia, puru tragica !) prova à sguassà ciò chì faci u sali di a nostra a cultura : u bè cumunu, u serviziu resu à l’altru chì abbisogna, à prisirvazioni di una richezza di sapè-fà è sapè-essa, è u mantenimentu di una vita rurali in disprezzu…
Stu focu, in fattu, hà datu l’effettu cuntrariu à quiddu aspittatu da i pirumani latri. Puru lampatu in pianu l’investimenti da 40 anni, si sò subitu datu di manu i benevulenti, membri è aderenti di a Casa Paisana « U Castagnu » di Bucugnanu, aiutati da ghjenti, istituzioni, merrii vicini o luntani, anonimi o cunnisciuti, pulitichi, culturali, associ, un populu s’hè arrittu torna una volta di pettu à l’infamia è u vargugnosu. È tandu si sò ritrovi facendi anticogni di l’uparata è di l’aiutu… Ch’eddi fussini tutti ringraziati da sta mossa cumuna chì ci faci creda ch’ùn emi micca persu ciò chì hà fattu a nostra Corsica, un sintimu spartutu da tutti da un’appartinanza à un paesi chì ùn voli lascià si supranà da i furdani…

Ma mi vena à menti una piccula riflissioni intantu… Parchì chì ùn hè chè quandu ci sò tragedii, straghji, o altri disgrazii ch’è no ci ritruvemi pà aghjunghja ci senza fighjulà, ne partitonu, ne partiteddu, ne culori, ne urighjina, ma femi casu à tuttu è à tutti ? Comu hè chì un paesi chì s’hè sempri datu di manu pà custruì insemi senza aspittà nunda di l’altru for’ ch’è u mottu è l’abbracciu, ùn sia più capaci di metta si in anda pà u bè cumunu, quiddu chì porta i valori middanii di a nostra tarra antica ? Ma una tarra chì voli campà in a mudernità senza sminticà mai i so radichi è i so sapè-essa !
Eppuru l’affari ùn hè compiu chì malgradu u sustegnu di tutti, d’un populu sanu, ci mancani sempri sti « soldi pà fà un francu », vali à dì chì semi in cerca di mezi finanziarii in sopra più da pudè fà campà u nostru associu è a so opara tarcana di a Fiera. Soldi è bracci… chì forsa l’invichjata di i nostri membri è benevulenti pudarà essa, à li fini, un altru periculu è un impettu tamantu pà l’anni à vena. S’aveti a brama (è u tempu) di dà di manu pà a prossima fiera, sareti i benvinuti.
Ma puru ùn calemi ne capu ne bracci. Semi sempri dicisi è pronti à fà fronti à tutti sti castighi, chì ùn ci farani micca cambià versu. Par noi altri di a Casa Paisana « U Castagnu » di Bucugnanu è di a Fiera di a Castagna, chì camparà a vi assicuremi,  tinimi à menti par lu sempri sta filusufia di i nostri anziani… Bastani i chjàchjari !
« FÀ… ÙN DÌ »