L’alivu, robba di pace è d'inseti

L’alivu hè l'arburu di e rivuluzione agrarie, l’alive cù a vigna anu lasciatu un’ impronta tremenda in quantu à a Civilisazione, per via d’una simbolica multiplice. Sicondu à Braudel, u granu, a vigna è l’alivu s’intreccianu à mezu à u mondu di u Mare Nostrum da truvà ci l’accunsentu nicissariu da pudè campà. Cù a leccia è u castagnu, participeghja ancu ellu à a specificità di i paesi isulani è lascia a so impronta indì a tupunimia. S’ellu ci tocca à schjarificà u postu tinutu da st’arburu ind’è l’imaginariu pupulare corsu, ci tuccarà dinù à rende contu di a variatezza di l’usi ch’ellu si ne hè pussutu fà sicondu à tanti sittori d’attività.
D’in fatti, à contu soiu, ci hè da interrugà a so lea cù l’ecunumia, u ghjuridicu, passendu per a simbolica o u riligiosu. U fustu, e ramelle, e fronde è u fruttu, ci insegnanu chì l’arburu palesa, ellu stessu, un rigiru di u mondu chì si scrive à mezu à una reta di significazione ricca assai. Di listessa manera cà l’arburi cunsacrati, l’alivu ci porta à piglià in contu u significatu, piattu daretu à u versu cusì sacru ch’ellu piglia.
Cusì ci rindimu prestu contu di u sincretisimu riligiosu forte ch’ellu sottintende è chì l’usi più sparti ripiglianu, sottu à tantu versi, u so carattare propiu sacru.

L’alivu hè assuciatu à i paesi di u Meditarraneu, secchi, petricosi, caldi. L’archeobuttanica hà datu e prove di a so specificità Mediterranea uccidentale. Trapprisente per u Mediterraneu, in Corsica, Sardegna, Sicilia, in Grecia è per i Baleari, ci aiuta à difinisce a cultura di l’aliva, ciò chì si prisenta da sistema compiu è variu per via di a tupulugia è di u fattu antrupulogicu.
L’alivu tramanda a mimoria cullettiva. Si ritruverà in parechje fole o miti di fundazione, è cusì purtarà succorsu è salute parechje volte à Ulisse, ma sottu à una forma dinamica. Sarà cusì u palu chì aiutarà à tuccà l’ochju di u Ciclope, sarà u manicu di l’arnese chì li ghjuverà da custruì u so battellu. E mitulugie greche è latine ci ammentanu l’arburu d’Athena o di Minerve, è di a prutezzione ch’ellu li purghjia.

Ind’è l’imaginariu ghjudeucristianu, e ramelle binadette sò simbulu di pace è di rinnascita veranile, tempu di primura in quantu à e feste pasquale è l’oliu sarà adupratu innù i riti di l’unzione è di u sacramentu. Da u Mont des Oliviers à l’Erechteion finu à e piaghje d’Eleusis, ritruvemu l’arburu chì puntilleghja i spazii sacri, impronti da a sacralità è da l’arcanu.
D’in fatti, insitatu da l’ogliastru, l’alivu hè un arburu propiu umanu, natu da un’opera antropica. Li sò stati cunsacrati tanti rituali è sacrifizii chì, a ci precisa Seneca, u clima di l’isula face chì l’invernata bianca si passa di l’alivi, grazia di Pallas.

D’appressu à u sturianu A.M. Graziani hè difficiule di cunnosce u statu di e culture nanzu à u 1530, sia nanzu à a discrizzione di l’Isula fatta da Monsignore Giustiniani. L’Alivu hè statu l’arburu chì hà permessu di campà malgratu a crisa di a sebbia (granu, sela…) di quell’epica, torna per via d’una scelta pulitica, l’arburu hè quellu più sfruttatu di Balagna, invece chì u castagnu truverà a so tarra in Castagniccia.
 

Ma hè per via ch’ellu raprisenta una ricchezza ecunomica di pesu chì a so distruzzione hè vulsuta, è soprappiù quand’ellu si tratta d’attaccà un arburu giovanu chì brusgia faciule. Cusì volta un’arma pigliata à contu di l’invasore è un mezu d’affrinà a pruduzzione ecunomica d’un paese.
Puru s’elle sò poche e tracce storiche lasciateci da stimà l’aghja di l’alivelle nanzu à u 1530, a cultura di l’alivu hè anziana assai è per u più situata sottu à i 600 metri d’altura. Pò stupisce st’ultim’infurmazione chì l’anzianità sottuposta di l’arburu hè stata accirtata da u travagliu di e scavate archeulogiche, è torna da i studii fatti in quantu à i mendi, trà l’attività suciale è riligiose di i populi anziani.

Tutti ‘ssi studii venenu insuchjà a tesi di Braudel in quantu à a sputichezza geugrafica di st’arburu. A scuperta di nociuli d’ogliastri fatta à nantu à u situ di Scaffa Piana, in Cismonte, hà permessu di fà contu di l’ipotesi di a prisenza po di l’adopru di i so frutti franti da tirà ne oliu, in li tempi di u Neuliticu mizanu. Stu custattu rimette in causa l’infurmazione puru sparta assai chì ammenta a prisenza di i fragni più anziani à partesi di l’Imperiu egizzianu anzianu, trà i seculi 27 è 22 B.C. [1].
I travaglii fatti in Sardegna parenu dà ci a cunferma chì l’adopru di l’oliu vegetale vinutu da u listincu è da l’ogliastru si lasciaranu supranà da l’adopru di l’oliu d’aliva, ancu s’ellu era pruduttu digià in li tempi nuragichi. Si ne ghjuvava omu tandu, da fà lume, è da robba da magnà, ma lascia sente u so carattare priziosu, per via, di a poca pruduzzione ch’omu ne pò tirà. À spessu si mischiava l’oliu di l’alive cù quellu di u listincu o ancu cù u grassu di l’animale.

Cusì ci preciseghja François de Lanfranchi  :
« Il nous faut distinguer l’huile purifiée et l’autre. Cette dernière est réservée à la guérison des brûlures. La première, l’huile purifiée, est une huile comestible très aromatisée, recherchée pour la friture des beignets (frittelle).
Cette technique de fabrication de l’huile de lentisque est instructive à plus d’un point. Elle permet de voir en premier lieu, que la paysannerie traditionnelle a considérablement amélioré les connaissances dans le domaine de la production d’huile à partir de plantes sauvages. En effet l’huile a été produite par pression du fruit et les pressoirs préindustriels de Corse attestent cette pratique. Par contre la notion de "purification" du produit primaire provenant de la pression peut être considérée comme une étape dans la voix de la spécialisation. Le passage successif sur le feu constitue un réel progrès dans le domaine de l’obtention de produits alimentaires. Enfin, troisième point que nous soulignerons, l’intérêt que l’homme a porté dès la préhistoire aux productions des plantes spontanées ainsi qu’à leur transformation des fruits de stockage difficile, en corps gras conservables. » [2]
 
Spuntanu in Corsica sette rughjoni principali induv’ellu si ritrova u sfruttu di l’Alivu : Capi corsu, Nebbiu, Balagna, U rughjone viculacciu è aiaccinu, Sullacarò/Ulmetu, Purtivechju/Bunifaziu, Sartè/Tallà. Ci sarianu sei varietà d’alive : a biancaghja, l'insetu vinutu da l’ogliastru, a sabina, a ghjermana, a bianca, a nera, a zinzala.

U locu è l’anzianità o nò di l’arradichera di l’alivi hè da piglià in contu, chì palesa a variatezza di e qualità di l’alive, di u tempu di a so racolta, di e tecniche di e fragnulere, è torna e qualità di l’oliu cusì tiratu.
Cusì, in Capicorsu, e varietà darianu menu oliu, ciò chì face ch’elle seranu scantate è siccate à l’incuntrariu di quelle di u Nebbiu, à cantu, è in particulare a biancaghja, chì caccia assai oliu.
A Balagna sarà forse u rughjone chì, cù Sullacarò è Ulmetu, ripiglia una tradizione più landana. L’oliu di Balagna, hè famosu è prezziatu assai per u sisu amarenu cusì particulare di a sabina. A Balagna trova cù l’alivu a so ricchezza prima, chì li permette di barattà è cummercià in Corsica sana è pocu à u fora : hè sprezziatu quellu sisu amaru per altrò.
Indù a Corsica suttana, trà Purtivechju è Bunifaziu, s’acconcianu e loche d’appressu à e sbuffulate di u ventu circhendu à parà i currenti chì pudarianu tuccà l’alivelle, è cusì saranu inalzate muricce alte. A varietà di u purtivechjacciu hè primaticcia è dilicata, è saria stata sfruttata di più à principiu di l’ultimu seculu. U rughjone di Sartè è Tallà sfrutterà a ghjermana, è darà un oliu pagnu.

Per via chì l’aliva si possi magnà à tempu colta o trasfurmata, l’alivu si scrive à mezu à un’almanacchera di i travaglii di a Terra. Cù un primu tempu, quella di a racolta, si principia un veru prucessu di muta di issa robba. Di regula, a racolta di l’alive si face da dicembre, vene dopu à quella di e castagne, finu à maghju.
Eppuru, u tempu di a racolta di l’alive siguita u tempu di a maturità di u fruttu chì lascia sente una sfarenza impurtante innù u Cismonte, da ghjennaghju à ghjungnu, è in Pumonte, trà nuvembre è aprile. Pare chì ‘ssu genaru di racolta chì permette à l’aliva di stà di più à nantu à l’arburu, si scrive à mezu à un tempu di pruduzzione longa chì a pruduzzione si face biannuale. Omu cerca à ghjuvà si di u tempu di a maturità, l’alive cusì belle maturate saranu frante più faciule è daranu un oliu più dolce.
A racolta si farà cù e rete, à quandu appiccate, in lu Nebbiu, à quandu spianate, in Sartè è Tallà. Ancu s’è l’interessu d’una scumpartera di e tacche trà spazii feminili è maschili, saria da ragiunà, ci tocca quantunque à accittà u fattu chì u rigiru di una sucetà detta tradiziunale s’arrembi à una scumpartera di e tacche trà omi è donne: Hè cusì chì a racolta cù u grembiu simbolicu assai di un feminile chì sà riceve tinendu u rigiru di a casa soia. Da a a racolta à a cucina, da a fabrica di l’ogetti rituali à l’assestu di i riti stessi. Di modu tradiziunale dunque, a racolta casca à e donne, à spessu aiutate da i zitelli, è l’icunugrafia di u XIXu seculu a ci mostra bè.

Di pettu à l’altri paesi di u Mediterraneu, a Corsica ùn hà tramandatu nisuna forma di cantu specificu in raportu cù e racolte di l’alive. Vene difficciule di truvà a ragiò di ss’assenza, ma hè un fattu di primura da avvicinà u campu etnumusicale isulanu.
Lavate è siccate l’alive, saranu frante, è finu à u XXu si pudianu cuntà finu à una cinquantina di fragni à paese. Si spiccanu dui genari di mulini : i fragni chì si ghjovanu di più di a forza di l’animale, a mula o u sumere dinù, adupratu da i traculini, po quelli à sbotru, chì si ghjovanu di l’acqua currente.
 

Arburu di vita, ricchezza ecunomica ricunnisciuta, l’alivu turnerà l’elementu predilettu da scugnurà a paura di a caristia. Ognuna di e parte sarà pigliata in contu, ciò chì ferma di a franta, è di listessa manera ciò chì ferma di u trattamentu di u granu o di u vinu, parmittia di nutrisce i schiavi, ci ramintava Catonu l’Anzianu.
« Gragnola : restes de pressage (déchets). Lorsque le pressoir était utilisé pendant longtemps, les restes pressés et mis sous forme de tourteaux (turtelli) composés de noyaux (nocciuli), et de peaux d'olives (buchje), étaient expédiés aux savonneries de Bastia ou de Marseille. Les noyaux (grògnuli) servaient aussi à alimenter le feu. » (D. Mosca. Lessicu "U Fragnu", Adecec)
 
Da u fustu, si pò caccia una qualità di legnu dura assai da fà cantelli è altri ogetti cummuni, piatti, cuchjare, oghje raprisintativi di l’arte artigianale.

L’aliva ferma un elementu riccu assai da luttà contru à u bisestiu per via di e so qualità nutritive ma aiuta torna à scugnurà a paura di a Morte per via di e so pruprietà di cunservazione. L’oliu ferma, cum’è u sale, trà di l’elementi simbolichi in lea cù u scorru di u tempu. U so usu permette à l’omu d’ammaistrà u scorru d’un tempu chì puderia purtà si ne di male a Robba, è invece, permette di mantene per via di a maturazione. Sarà l’oliu l’elementu predilettu da cunservà è à spessu assuciatu à l’agliu, pianta, radica, chì rammenta una prisenza di a Morte o d’una forma di muta da sapè sfruttà.
L’oliu hè dinù adupratu da i rituali chì si ghjovenu di e so prupietà fisiche da avvicinà l’arcanu spirituale. Pinsemu tandu à l’Ochju chì si ghjova di l’acqua, di l’oliu è di u lume da aiutà à francà u passu di u male vinutu da u sguardu di l’altri. U lume spentu o accesu di a chjòchjula, antica lampana di tarra cotta, ferma un indiziu di primura in quantu à a prisenza di quellu o quella chì si cerca à caccià fora di u corpu di a persona annuchjata. U lume di a chjòchjula, l’ochju, eccu sicuramente tante prove da vede, leghje o misurà à partesi d’avale ciò ch’hà da vene.

Ritruvemu a brama di scugnurà è di sfucà u male infattatu, o a paura d’una morte simbolica chì si cunfonde à spessu cù u scorru affannosu di u tempu. L’oliu hè à spessu assuciatu à una medicina, u so valore apotrupaicu, li darà à spessu un particulare purificatore, si pensa à i lavativi per esempiu ma si puderà sente dinù ch’ellu pò affrinà e pene di l’arechje.
Si nuterà oghje torna u so adopru ind’è a cumposta di i prudutti da curà o parà a ghjunta di e rinvicule, sia e tracce di u tempu à nantu à a pelle, da ùn sentesi invichjà o forse more troppu in furia.
Di listessa manera sarà l’elementu predilettu da e porghe, da lavà ghjente o panni. È si ritrova, sicuramente pè u Mediterraneu sanu, da nittà e prutege à tempu i ciucci nanzu di turnà à fascià li : l’usu d’ungne e criature hè anticu è si ritrova ancu in certe prigantule da curà u focu. Hè cusì chì l’oliu si trova indì l’usi curativi da parà si di u tempu distruttore, è dicerà e prove tante di l’ammaistrere di u so scorru, trà nascita è morte.

U lume è u focu parmettenu di mantenesi à longu andà. U lume si vole ricchezza spirituale, chì schjarificheghja e bughjure è avvia u passu di l’omi. Si capisce chì i rituali liturgichi di a tradizione ghjudeucristiana accumpagninu u passu d’ogni cristianu da u so battesimu à a so morte, cù pè un dettu l’olii santi, o a strem’unzione.

Oghje cù a muta di u tempu è di e timperature chì crescenu sempre  più, omu truvà l’alivi ancu in muntagna.
Segnu chì s’è l’oliu hè simbolu di Pace è di Salute (intesa da divizia), hè à tempu à quellu d’una cura nova da sapè custudisce. St’analugie simboliche lascenu sculinà a lea cù un Tempu in traccia di fà si, da un passatu cummunu, è pigliarà i tratti specifichi cuncessi da ogni cummunutà chì si ne ghjuvarà da ricunnosce ghjente, lochi, è tempi soi, passati è à vene.