Robba
 



Trà Materia è Spiritu, Robba si face



A robba palesa u valore ch’ella cuncede una sucetà à u fruttu di u so travagliu. Studiendu ‘ssu valore cuncessu à a robba, da e pruduzzione à u cunsummu finu à u trattamentu di i resti, Ghjacumina Acquaviva-Bosseur ci aiuta à schjarificà a logica fonda di l’urganisazione d’una sucetà. Hè cusì chì l’ecunumia parmette à l’omu d’arradicà si è di situà si à mezu à un tempu, un spaziu belli particulari.



Pierre-Paul Rubens, Récolte de la manne dans le désert
Pierre-Paul Rubens, Récolte de la manne dans le désert
Da turnà, è fà la finita, cù a tematica di l’alimentariu, ci pare di primura di schjarificà a parolla Robba. A pulissemia di Robba ammenta una banda di pécure o di capre pè u più, animali ammansati po allevati. A parolla indetta torna a frutta, l’urtaglia, nativa o posta cù tuttu ciò chì si manghja. Nuteremu una muta, forse più oghjinca, di u sensu di robba verdi u sensu allargatu di pruduzzione umane da u cunsummu. A parolla pò ancu piglia u sensu di l’appartinanza à un ceppu, è torna sinonimu di razza, sterpa da pricisà a particularità o u valore di qualchissia : Hè robba di scimarellu o hè una rubbaccia. A parolla è u sensu ch’ella porta spechja e raprisintazione materiale è spirituale chì arriguleghjanu u cunsummu. D’in fatti a robba hè sinonimu di furtuna da acquistà. U fà di l’omu hè quellu chì U Tempu o Diu, li vole cuncede. D'infatti per ciò chì tocca à l'agropasturalisimu, hè solu "sì Di'vole" chì u fà di l'omu permette d'acquistà, tene, è mantene u Cummunu.

L’accunsentu trà ecunumia è spiritualità

A pruduzzione è u cunsummu di a robba sò l’arnesi primi da cunduce una sucetà. L’industrialisazione po e tecnulugie nove di a cummunicazione anu vultulatu e forme di i prudutti, siguitendu e pruduzzione è i nigozii stesi di a robba. Eppuru fermanu nicissarii u travagliu è u cunsummu di a robba da luttà contru à u sprufondu. Cambiendu ecunumia, un paese cambia u raportu soiu à l’ingiru, quant'è a so cuncipitura propia di u Tempu o di u Cosmos.
S’elli tornanu prisenti ind’è l‘attualità i prublemi eculogichi, hè ch’ellu ferma nicissariu u raportu à l’ingiru naturale da ritruvà un rigiru fondu. L’ecunumia articuleghja u raportu à u spaziu campatu da una pupulazione, è hè par via di ‘ssa lea ch’ellu si puderà situà, tantu da un versu ecunomicu cà da quellu spirituale.
Ferma di prima trinca l’accunsentu trà ecunumia è spiritualità, trà etica è a cerca esistenziale. Hè in ‘ssu filu ch’elli sò nati i cuncetti novi altermundialisimu, cummerciu paru…

Trà robba è ghjente, tante chjam’è risposte

Hè interessante l’ambiguità intesa da a robba, inseme genericu, neutru ramenta a parolla a ghjente, chì, di modu tradiziunale, rimanda un inseme chì li hè oppostu. Robba è ghjente parenu misurate una di pettu à l’altra. Cusì a robba ammenta un cullettivu vivu, largu, difficiule da difinì. Participeghja à una scumpertera di u mondu chì ci vene sicuramente d’una cusmugunia antichissima induce l'omu si misura di pettu à una robba spatrunita.
"Salute è pace chì robba si face" per l'auguri di Capu d’Annu. U dettu trasmessu palesa quindi trè elementi di primura à prò di un’ecunumia chì riposa à nantu à a sucetà à quale omu s’addirizza quindi : A salute hè da avvicinà di a divizia, da parà si di a caristia trà fame è morte. A Pace ammenta dinù quellu armone di u muntone, chì certi pastori sanu leghje. A pace sottintende un parcorsu, a forma d’un tempu misuratu à partesi di u spaziu campatu, chì si truvaria raprisintatu à nantu à l’ossu di l’animale. Si tratta d’un tempu à vene, ancu à ricunnosce "da prigà si la bona", ma chì certi, solu, sanu leghje.
 
 
 

Robba trà salute è morte

L’origine di a robba, quant’è quella di u mondu, ci veneria da una grazia divina. A divizia, sottu à e so forme parechje, raprisenta a fiura di una furtuna da acquistà o riacquistà da sottu à una forma più o menu raziunalizata sigondu à l’epiche.
A robba hè l’elementu "naturale" chì parmette à l’omu, per via di e so faccende, di luttà contr’à a morte, liata stretta à l’allegurie di a fame : Mamma Piera, Musina
Sarà forse per quessa ch'ella ci hè firmata à mente in Lozzi una passata: Quandu u spiritu d'una persona scruchjava sottu à l'ochju di qualchissia,  solu una voce lampata pudia scugnurà sta morte annunciata " Robba! Robba!".
Eccu chì a robba si face ancu sacrifiziu nicissariu, barattu pussibbule d'una vita umana, quant'è ch'ellu ci fussi manera di pattighjà cù u mondu di i Spiriti... Ci si pò vede a lasciata di ciò chì P. Descola definisce da l'analugisimu, spartu per L'Europa nanzu à a Rinnascita. Si tratta d'una manera di campà u mondu, in li tempi chì l'omu pensava avè da pattighjà cù i morti, è i spiriti, più cà cù un Diu unicu. 

 

Mondi è Robba à vene ...

S'è u Marcatu oghje hè à spessu apparagunatu à una robba di Divinità neuliberale, chì tira versu a munucultura, l'analisi di a variatezza di i mudelli ecunomichi è culturali merita un'attenzione propiu nicissaria à l'epica di a quinta sterpizia è di a minaccia chì  rode a biodiversità.
Cù a pruduzzione po u cunsummu di a Robba si sprime una cosmugunia più o menu stesa; si face sente u bisognu di piglià forza è ceppu (appartinanza à una Terra è à un cullettivu). Quantu à livellu individuale cà cullettivu.
A robba lea u materiale à u spirituale per via di ciò chì l'antrupuloghi chjamanu l'ontulugie (o manera d'Esse di pettu à u Mondu). A tradizione urale corsa ci hà trasmessu una memoria di l'ontulugia analugista, ma si tratta d'una tradizione chì si trasmette à tempu ch'ella si torna à interprità, cambiendu forma sigondu à i bisogni di cullettivi è di i spaziitempi ch'ella piglia in contu.
Cusì e tradizione permettenu un accunsentu ecunomicu arradicatu à i so lochi particulari assai, à prò d'un cullettivu chì supranessi a spiccanza naturalista trà di l'umani è l'altri, ch'ellu supraneghja.

Participeghjanu e tradizione, à turnà à pinsà u nostru raportu à u Mondu, per via di u valore ch'è no vuleremu porghje à a Robba, pudemu ricunnosce, da per noi, a Robba Nostra, à mezu à un spaziutempu campatu è sfruttatu, di tanti versi. 
Per via di i sapè fà tradiziunali si ponu mette à u provu parechje manere di produce è di campà un locu è un cullettivu sempre pronti à risponde si, da vicinu po da luntanu.
Ci hè da dumandà s'è a Variatezza d'un'ecunumia mundiale oghje, puderà turnà Ricchezza ricunnusciuta lascendu da cantu a munucultura di u cunsummu sfrinatu, da fà di a biodiversità (materiale è immateriale) Robba di vaglia da custudisce.


 
Dimanche 26 Décembre 2021
Ghjacumina Acquaviva-Bosseur


Dans la même rubrique :
< >