L’essezza, vista da Rinatu Coti

Tonì Casalonga, Heureux le peuple

L’essezza ùn hè micca un elementu stragneru chì saria statu cuncessu da una forza sopra à u locu è à u populu, è patronu d’eddi. Hè a propia attaccanza carnali è mimuriali ch’eddi ani inghjinnatu insemu a terra nustrali è a ghjenti nustrali par fassi storia. O par dilla d’un antru modu, l’essa cumunu – chì l’essezza ùn hè roba individuali – hè natu divintendu locu a terra, è populu a ghjenti. L’essezza hè da veru l’acchisi di riiru di a cultura corsa. Sì un fruttu purtessi megliu paragonu di sta nuzioni forsa appena mal capiscitoghja, s’era pussutu dì chì a lingua hè a peddi, a cultura hè a polpa, l’essezza hè a nuciola cù ciò chì ci hè drentu : a forza sprapusitata di a vita simplicia (…)

Cultura viva ?

Una cultura viva ùn si po' accuntintà d’essa solu una cuncolta d’uggetti accatamansati da i seculi è i seculi, di leva in purleva. A cuscenza di l’omu ùn hè micca un minucciu chì si allarga via via và culmendusi d’imbutu à colpu di manghjamentu. Empia i mimorii è riempiali, ùn faci micca sempri viva i menti comu si devi, è i pò ancu turrà schiavi persi. Schiavi sudesfi è techji, ma beddu è ch’è bè schiavi quantunqua. Par falli mutà passu da veru è vulessi libarà senza aspittà u terzu è u quartu, a cultura bisogna ch’edda fussi intarrugativa, veni à dì : ponali quistioni chì so di primura è impidalli à ponasili da per eddi. (…)

Cunquistu di dignità

U populu ùn hè micca isciutu avà da u nidu; ùn ghjunghji micca in tempi d’oghji, à mani bioti. A so cultura hè sintimu di cuntinivezza : dumani hè figliolu d’oghji chì hè statu figliatu da arrimani. Hè vulintà d’essa maiò di u so locu è patronu di a so sorti. Hè ricordu fondu ma sempri sottupedi è sottucuscenza di a inghjulia, di a inghjustizia, di l’upprissioni. Hè odiu trimenti di i fandogni, i fisserii è i minchjunati chì u numicu li voli impona. Hè cunquistu di dignità, senza mai nigà nè pruibì u drittu di qualunqua u rispetta.

Locu è Populu

A terra è a ghjenti sò stati dati da a natura. Ma u locu è u populu sò i prudutti prilevati di a ghjenti è di a terra chì contrani. Ed hè ghjustu appunti issu rapportu chì esisti trà u locu è u populu chì porta cun eddu l’essezza stessa di u populu. Ci hè una pruiezzioni à un doppiu : di a ghjenti annantu à a terra – da quissa veni fattu u locu -, di u locu nant’à a ghjenti, - da quissa veni custituitu u populu.

Firmà populu

Hè par via di tuttu quessu, chì tocca à u populu, unità fundata nantu à a cultura, è micca nantu à a purezza di u sangui, o u culori di a peddi, à mantena a so essezza, è à falla ogni ghjornu ch’edda ùn turressi vanochja, s’eddu vò firmà da populu.

Per andà più in là

Pudete ritruvà a bibbiugrafia di Rinatu Coti quì
In quantu à u libru Intornu à l'essezza, hè statu ripublicatu da Editions Eoliennes in u 2004.