L'operata, vista da Petru Casanova

Ma cumu s’aiutavanu¹ per sortesine à la megliu di certe imprese, i nostri antenati ? U principiu era urdinariu, chjaru è nettu. A ghjente, dicu u sterpinu² più ch`è l’individuu interessata à un travagliu ch’ella ùn pudia rializà da per ella, avertia i so stretti³ è i paisani⁴ di l’affare o di u travagliu à fassi. Ancu senza spanticalla⁵, a ghjente avisata, mandava à dì ch’ell’era o nò d’accunsentu, o per a ragione ch’ella ùn pudia vene.

Per quelli ch’accittavanu, bastava à prevèneli capunanzu.

Di versu è di manera⁶ chì stu sistema d’antica muzzèca⁷, donde u tempu era zócculu⁸ di spartizione d’un travagliu cullettivu, necessariu, impurtente, o chì ùn si pudia parà⁹.

‘Ssa manera d’aiutà avia u so misuru¹⁰. Stonde per certi travagliucciuli¹¹, ghjurnate per i travaglioni.

Ebbè ‘ssu sistema tenia cusì, un certu equilibriiu è addattamentu¹² per ogni situazione.

In li crudi tempi passatoni, l’individuu, à l’epica una bàzzica¹³ appéttu à a putenza di a parintia.

Però, a chjama intesa, una volta accettata, corciu à chì a lasciava in chjantu¹⁴. Ùn ci scurdemu chì tempu fatta a chjamata, ne nascia¹⁵ un debitu accesu ver’di i participenti, chì l’imprestatore¹⁶ devia spegne¹⁷.

Allora chì l’impretaticciu¹⁸ di a so forza, ghjàlabu¹⁹ o rigiru²⁰, acquistava un crèditu per ùn dì murale, riguardu à l’operante²¹.

Eccuti cumu, à pocu prezzu, s’alzavanu case è forni, pagliaghji, chjostre, compùli, aghje spianate o allinate²², fundali²³ rifatti, sighere²⁴, tribbiere, tundere, vindemie… Vera chirientùla²⁵ di tutte ste faccende d’aiutu à l’antica. Salvùne²⁶ qualchì casu speziale, per certi arte o mistieri, donde a paga era d’usu, si parla per esempiu di médicu, nutaru, stimadore, lùseru.

Artigiani innò : scherparu, bancalaru, stazzunaru… Tutti quanti avendu cum’ellu s’hè dettu, paga per serviziu fattu.

Quandu omu si barattava²⁷ prudutti a manera di fà u scambiu o u négoziu era stabilita è di pùblicu andà. Ùn si parla quì di buttea è cummerciu, ma di tanti baratti d’ortaglia, frutta, biada, legne è legnu… Tuttu si misurava è si pisava.

Ch’elle fussinu libbre o bacinate, a parità di spezie è prudutti era stàbilita è di publicu andà²⁸.

In tutti stu varii casi, si parlava di barattu. Quì, à l’incuntrariu di l’Operata, u tempu firmava for’di ghjocu²⁹ è l’acconciu, à tè è à mò³⁰, prestu cunclusu.

L’Operata ella, ferma l’Opéra maiò di riesce ciò ch’elli ùn si pudia fà cù e so sole bracce, è ciò, senza spende un quattrinu.

Cumu ritruvà tale virtù, si capisce senza paragone d’èpica³¹, cumu rimette in sesta³² issu beatu usu di l’operata ? Usanza donde i discipùli³³ di una tale pràtica veramenti degna d’una disciplina ecólogica di i tempi chì còrrenu, ciò chì aiuterebbe, appena adatta, una vera avanzata di l’andatura³⁴ umana.

 

Opérata : Chì ne dice u dizziunariu « Ouvrage d’une certaine ampleur exécuté par les membres d’une communauté, dans l’intérêt public ou privé (dans ce second cas, selon la réciprocité communautaire »

Chjamata ; « Appel à main forte, adressé à la communauté villageoise à l’occasion d’un travail requérant une nombreuse main d’œuvre.

Petru CASANOVA, Motti : parolle è cugnole di a parlata nustrale
Pascal MARCHETTI, L'usu corsu